母親節小品——媽媽的氣味

thumbnail

呢齣由長者安居協會推出嘅社會實驗短片,搵嚟四位女兒,睇下佢哋可唔可以憑衣服上嘅氣味,認出邊件衫媽咪曾經著過。實驗結果,四位女兒有兩位認唔到,而每位女兒之後嘅真情流露,同在場媽咪之間嘅坦誠互動,亦感人至深。

但小編睇完,忍唔住浮現一個疑惑:會唔會成件事只係Set Up嚟呢?

短片創作主腦,Narrow Door 嘅Terry表示,呢齣係百分百真實嘅社會實驗短片。「因爲客戶係NGO,資源有限,一切製作我哋都係親力親為:搵嚟相識三十載嘅前同事岺蘊華導演仗義幫忙,之後就逐一聯絡身邊合適嘅訪問對象,從親屬到教會到同學老婆到朋友到新舊同事,難得湊夠人數,三代都願意出鏡,又要通過深入面談,確保母女之間關係有獨特性,並且喺唔穿橋之下吸引佢哋嚟拍攝。」

咁當初係點預計效果嘅呢?若果四位女兒都認到媽咪嘅氣味,咪會令戲劇效果大減?「若果全部女兒都認得媽咪嘅氣味,就會叫佢哋講多啲認得嘅原因。另外,呢條片出咗四組母女,實際上我哋係拍咗六組,再喺當中揀選最能傳達主題嘅片段出街。」

「佢哋嘅故事,打動咗在場嘅每一位工作人員。其中一位受訪者喺拍攝完成後whatsapp我,感謝我幫佢開咗一扇門,同媽媽講咗一直埋喺心底嘅說話。單係收到呢個訊息,之前所付出嘅一切,已經值得。」Terry 說。

母親節,唔一定剩係講「母親節快樂」,呢齣短片就提醒大家,有啲嘢錯失咗係返唔到轉頭。關心媽咪,想佢平平安安,記得要及時。

Leave a Reply

Your email address will not be published. Required fields are marked *

Back To Top
Copy link