Author: Madman

當客戶肯為成就一條片,Cut走自己段硬植入:香城映画《冷氣軍師的最後12夜》

你有冇試過睇完一條片會起身鼓掌致敬? 我講緊係網片,仲要係自己一個人喺屋企,身邊根本無人,但就一個人喺度自High。 我試過,因為香城新片《冷氣軍師的最後12夜》真心太高汁。 16分鐘嘅短片,男主角Ronnie著住希魔軍服做趙軍師,不斷拯救萬民——教沉晒船嘅「最愛生炒骨1314」點止蝕離場、教阿仙奴球迷下半場應如何佈陣、連美國總統公布UFO檔案之前都要打畀佢請教⋯ 一切都係佢腦補。現實係佢只係一個三年冇出過間房,靠唞冷氣同上連登指點江山過活嘅隱青(Andrew飾)。 最後為咗跌親嘅阿媽,佢終於走返出房,行返出街,約咗識咗多年,真身原來係同樣靠修圖扮靚女嘅網友Chloe出嚟見面(阿霞飾)。 撞正外星人襲地球,兩人嘅對話勁有意思。 「如果嚟緊世界末日,你諗住去邊呀?」 「我未諗到呀,不過一定唔會去防空洞,因為嗰度乜都睇唔到。」 然後兩個人就真係手牽手,上咗天台睇外星人滅地球。 配合埋音樂,講真,即使毒男配醜女,都真係有啲感動。 「多謝Shell」之後,我好耐冇試過咁想多謝一個金主爸爸,今次真係要多謝sim Credit Card(呢篇文絕非廣告)。 點解?因為相信冇佢嘅支持,呢條片就唔會咁重本,請到咁多人客串(睇到非洲王子爆粗真係笑L咗)。 最難得嘅係,我本身係香城YT一級榮譽金鑽會員(已連續課金24個月),前晚已經優先睇咗呢條片,當時明明有一段餐廳對話,係硬Sell 嚟緊嘅信用卡Offer。 結果條片13小時前重新Upload,成段Cut咗,寧願喺片尾Roller後先補返推廣資訊。 講真原本植入資訊雖然突兀,但網民一般接受(channel都要搵食架),但為咗唔打斷敘事節奏,客戶竟然肯咁大犧牲Cut咗佢,係對條片幾大信心先覺得可以留住網民睇到片尾彩蛋? 所以,本Channel雖然絕少主動講香港廣告(原因你懂的),今次都要主動講一次,希望大家都支持呢條片,睇到尾,支持埋肯支持本土創作嘅金主爸爸。

劉俊謙小米Leica手機廣告,這麼遠那麼近

劉俊謙新小米Leica手機廣告,用佢把高音甜低音勁嘅磁性聲線話你知,做創作,最緊要識「囤貨」。 唔係打風掃杯麵嗰隻;係平時儲底生活片段,有需要拎得出嚟用嗰隻。 「角色唔係演出嚟,係別人生命借嚟嘅微光。」 演員要一秒入戲、廣告橋要一晚度出嚟,平時就要多做靈感訓練。 認識唔少行家或設計師平時都有儲貨習慣。 街拍page、文案庫,甚至紀錄每朝晨光,心情好仲會開心share,朋友都可以偷師,係有益的,健康的hoarding。 廣告取景台北民生社區,長焦鏡下連樹葉透出來的陽光都立體啲。 平時鍾意周街影廣告,所以潛望式鏡頭對我最大嘅好處,係唔洗專登過馬路都可以清晰影到對面街塊廣告牌上嘅內容。 好多創意,都由一張相片開始。 「最動人嘅戲,早就被日活演過千萬遍」,就睇你識唔識發掘吧。

滙豐 X 安成宰《最紅大廚》

點,先可以撐到香港餐飲業? 或者你都睇過太多「香港餐廳倒閉潮」嘅新聞同影片; 或者你都寧願儲起啲錢,喺香港食兩餸飯,去到外國先至歎大茶飯; 或者你都暗暗覺得,好多香港餐廳都唔抵幫,同一個價錢,返鄉下或北上可以食得更好、更豪。 但,香港嘅餐廳,真係全部都唔值得撐? 明明我哋有咁多餐廳,默默經營,為嘅就係守護一直傳承嘅味道; 明明香港味道自成一派,世界各地都有以「香港味道」掛帥嘅餐廳林立; 明明香港係片福地,一直吸引世界各地嘅名廚嚟開業插旗; 明明香港一直係名副其實嘅美食之都,擁有世界排名第五之多數目嘅米芝蓮食府⋯ 唔通真係要有餐廳每次宣佈光榮結業,我哋先至如夢初醒,一窩蜂走去幫襯,懷緬兼打卡一番? 感謝滙豐 ,覺得好餐廳、好味道值得力撐; 更出錢出力,聯乘《黑白大廚》三星評審安成宰,舉辦《最紅大廚》料理真人騷,招募全港餐廳參賽,以名人效應、實際行動、百萬獎品,引發對參賽餐廳以至全港餐飲業嘅討論同支持! 而話說呢個campaign ,一開始嘅起點,係源自我嘅創意小店——Madkids 嘅提案。 當時想法好簡單,就係黑白大廚裡面,只有一位真係同香港有淵源,就係喺西九開設Mosu Hong Kong嘅安成宰。 當時提議呢個人選,只有好初步嘅campaign構思。係擁有遠見嘅客戶表示,好想幫助餐飲業,成個企劃最終先成為今日大家見到嘅面貌。 如果你都係餐飲業一份子、想喺安主廚面前獻技,今次話唔定係你一戰成名嘅機會; 而如果你只係普通消費者,你都可以多啲幫襯心儀餐廳,然後鼓勵佢哋出戰。 既然有客set 咗平台,當然要好好利用啦,係咪?

Patagonia捐出公司98%股份撐環保

每逢有人做好事,總有人衝出嚟潑冷水。 Patagonia創辦人日前宣佈捐出公司98%股份予NGO,應對氣候危機。消息一出,例牌有人質疑此舉「漂綠」(greenwashing)、做show云云。 如果生意人講環保就等於做show,咁呢位以設計攀山裝備起家的創辦人Yvon Chouinard早就承認,每個以環保為原則做的商業決定,都確實有錢賺。 “I know it sounds crazy, but every time I’ve made a decision that’s best for the planet, I’ve made money.” 而呢場show都做得幾認真,例如自80年代起已自發交1%地球稅、採用有機棉同回收聚酯纖維,仲不時承認自己做得未夠好,例如2011年呢款平面廣告「Don’t Buy This Jacket」。 特登揀喺Black Friday叫人唔好買佢件jacket褸,原因寫在文案中,因為製作這件褸要用上135 lit水(相等於45人一日攝取量)同運輸產生的20磅碳排放等。 廣告當然唔係叫你罷買,而係叫你買之前諗諗。你可以批評佢搏眼球、虛偽,反正零成本。但你可曾見過淘寶叫人網購前三思? 關於虛偽的指責,Patagonia似乎已見怪不怪,更曾回應:“It would be hypocritical for us to work for environmental change without encouraging customers to think before they buy.” 公關show認真做,仲做足幾十年,我又真係唔介意買飛入場睇。 更何況,能夠引發思考的廣告、舉動,是否做show,真係咁重要?

HSBC新廣告的戀愛啟示

男歡女愛,點先叫有將來,都21世紀了,如果你的答案依然是一隻鑽石戒指,咁就要睇下HSBC呢條新廣告。 心思細密的徐㴓喬,開朗不羈的張樂陶,她和她的故事同你我一樣,有輾轉思念,亦有柴米油鹽。 當關係走到樽頸,唔少人以結婚作為突破點。但對於她們倆,一紙婚書今時今日太過薄弱,比不上共同創業的刺激、一齊闖關解鎖打天下的浪漫。 一向對銀行廣告冇乜期望,走得出企業框框的少之又少。所以HSBC今次以女女點題,仲敢挑戰天下男女都為之奔波勞碌的人生大事,無論你認同與否,都確實耳目一新。

廣告人移民誌 — Jansen Lu

Jan’s Tech Blog版主Jansen Lu投身廣告及媒體界20年,由Agenda、CMRS、Group M 到壹傳媒,給人的感覺除了能幹、謙虛,還十分有心,在個人平台一直發表數據分析文章,亦不時參與講座,分享社媒數據心得,也培育過不少新血。在《蘋果》擔任社媒總監的三年間,卻碰上香港的社會轉捩點,然後便是疫情來襲,經濟重創。 如此背景,不難想像是甚麼令他決心於去年年尾移民台灣。能驅使一位土生土長香港人把數十年人生連根拔起遷居他鄉,並非一般的風高浪急所能做到。「2014年已經睇到條軌跡係點,開始萌生移民念頭,主要為家人。移民對自己career影響有幾大,反而已經唔係最重要。」Jansen分享說。 選擇台灣,很大程度上是家人的決定。到埗三個月,Jansen現居新北板橋,毗鄰江子翠、新埔站,前往台北例如大安、西門町等,乘搭捷運亦只需半小時。閒時Jansen會散步前往板橋站或府中,也不過半小時。 「我哋屋企生活好簡單,平時會去附近嘅人工濕地,有時仲見到老人家釣魚,生活好悠閒。但其實同以前喺香港嘅生活冇乜分別,都係散下步影下相咁。」 在廣告公司的日子,Jansen不時與台灣分部進行定期交流,與當地同事一直保持聯絡。如今初到貴境,舊同事除了積極照應,更有台灣老朋友與Jansen談合作,沿用他在香港的公司名稱Azzure。 「台灣嘅廣告圈生態已經好成熟,要打入去唔容易。所以我想由event開始,搞多啲workshops,作為同台灣人networking嘅平台。早前呢度有香港人搞聖誕市集,見返好多香港產品,茶餐廳、雞蛋仔都有,係畀台灣人認識香港文化嘅好機會。」 現時移台有5種方法,Jansen選擇投資移民,入場費600萬。在台灣開設公司要預先決定公司性質,提交計劃書,亦需證明具備相關技能。到埗後,公司每年需聘請至少兩名台籍員工,營運滿3年才能入籍。 「移民過嚟嘅廣告人大多數自立門戶,好少入返廣告公司做,畢竟呢邊pay cut至少係香港嘅三分一,冇乜香港人接受到。反而英國好啲,我認識部份移民英國嘅行家就入得返廣告公司做,嗰邊market大好多。」 就算肯花錢在當地自立門戶,也難免經歷一番背景審查。台灣為防範政治滲透,對擁有傳媒背景的移民審查比其他行業都要複雜。作為前《蘋果》員工的Jansen體會尤深,那怕當時只負責數據分析,只寫社媒營銷。 「台灣對香港傳媒審批特別嚴,唔單止要prove 你有相關工作經驗,仲要提供工作證明、大學畢業證書。有啲根本搵唔返,我惟有provide以前寫過啲專欄、blog posts,證明我對行業嘅知識。有其他行業嘅朋友移台,幾個月搞掂。我就等咗超過一 年,但我好明白點解台灣政府要咁嚴。」 等,似乎是香港人出洋移民的一大課題。由申請手續、審批程序,到定居後適應全新生活步伐,都係考驗。例如在開設個人銀行帳戶,Jansen在分行花了半天。 「呢邊生活無疑係慢好多,但適應咗就可以。」 外國月亮有沒有特別圓,從來睇你點睇。畀你搬到倫敦泰晤士河畔每日餵鴨賞花,或搬到阿爾卑斯山上的小木屋慢活養生,沿用在香港所習慣的生活節奏過到去能否享受,能否欣賞,又係另一回事。 「喺台灣生活有好多嘢要學。我指係佢哋嘅文化。例如我初九凌晨仍聽到人放煙花,原來是天公誕。」Jansen總結。「但台灣人好nice好熱心,人情味重,對於鍾意清靜嘅人嚟講,台灣係唔錯嘅地方。」

Wordle掀起的抽水熱潮

Wordle熱潮近月勢不可擋,品牌當然不遺餘力相繼抽水,當中尤以Guinness這個廣告最為精彩。 雖然這並非official ad,而是英國創意公司Something Big創作總監Sam Hennig為網上創意比賽平台One Minute Briefs設計的作品,但整個concept甚至比Guinness自己的抽水post更勝一籌。 更多品牌抽水作品: One Minute Briefs上還有不少啟發自Wordle的創意佳作,不妨作為靈感參考:

日本「流星」火車,劃破九洲夜空

一列火車,點解足以連繫人心?因為一束光。 這段剛榮獲日本廣告人協會(JAA)大獎的九州新幹線廣告片名為「流星新幹線」,構思好簡單,在行駛中的列車上打出幾束LED強光,在紀念火車開通的3月14日行駛一天,夜幕下就像一串流星,劃過福岡至鹿兒島的民居之間。 遠處,上萬名九洲居民在不同地方拿著「竹」光在流星列車劃過之際許願,呼應貼滿車身內外來自日本各地居民的願望,旨在把「希望之光帶給九州,帶給日本,帶給大家」,廣告如是說。 能夠拿下JAA電視廣告類大獎,要有「橋」之餘,更要夠意思。「流星新幹線」之所以找來上萬名居民參與拍攝,跟它多災多難的歷史有關。 幹線於2011年3月14日開通,配合一段被譽為「夢幻cm」 的3分鐘宣傳片上架,片中萬多名九洲居民對駛過的火車拍掌歡呼,非常upbeat。可惜幹線生不逢時,開通前三天撞正311大地震,因為廣告氛圍不符合民情,沒播出幾天就下架。 十年後的3月14日,九洲以至全世界都正被疫情摧殘,所以「流星新幹線」沿用十年前宣傳片的構架,加入一串劃破黑夜的「希望之光」,寄語我們一路往前。 最簡單的execution,足以發輝最大的效用,就好似希望呢家野,唔洗多,一點點就已經好夠。

Tinder話你知:You’re Not for Everyone

肯認錯,咪好囉;但如果真心想重新做人,好想贈你Tinder廣告一則:「You’re Not for Everyone」。 所謂寧缺莫濫。所以連「閲人」無數嘅交友平台Tinder都推出新功能Explore,依照用家興趣進行配對,言下之意,唔係個個都match架。 當然,這句tagline其實另有意思。 30秒廣告片只得一個場景:女主角好平靜咁做緊冥想瑜珈,突然神經質發作,向無意闖入的同房失控吶喊「I’ll murder your family!」,一秒人格分裂後重回平靜,又tender又loving。 呢種所謂quirks,亦即大大小小的怪誕行為,你有我有。咪以為自己好正常,試吓問身邊嗰個,或者你啲兄弟BFF,答案可能令你驚訝。 Tinder話你知,quirkiness is okay。唔單止ok,分分鐘成為你嘅個人風格像徵。一句口頭禪、一個小動作,或對一件舊物的執迷,每一種不敢示人的quirk,可能是在某人眼𥚃的可愛,甚至魅力所在。 但長期對某事物過於執迷……確實有損健康,花生食得多都熱氣啦,以後要三思啦。

Peloton 38秒神回覆《色慾都市》公關危機

所以話,唔洗元宇宙,我哋早已活在虛構世界。 HBO Max美劇《Sex and the City》再度回歸,新一季《And Just Like That…》第一集就發生命案,男主角Mr. Big喺Peloton健身單車運動後心臟病發身亡,令品牌不滿形象受損。 係人都知角色同橋段純屬虛構,演員Chris Noth仲生勾勾,但Peloton股價仍然因此下跌,反映大家煲劇的投入程度。市場還在眾說紛紜Peloton可否提告HBO Max之際,Peloton今日就畀咗個更好嘅回覆⋯⋯一條38秒廣告片宣佈:「And just like that…he’s alive」。 據說短片只用了48小時製作,Chris Noth幾句對白「To new beginnings 」、「I feel great」、「Shall we take another ride?」等,幽默反串Mr. Big在劇中的悲慘結局,喺Twitter出街唔夠半日,已斬獲3萬幾likes。 短片能否avert the crisis尚未可知,但比起同HBO對簿公堂,今次神回覆,確實大方得多。

Back To Top