Author: MadMan Magazine

離留之間,廣告人如何決擇?

社會驟變,不少廣告人在猶豫自己及公司的去留之際,Tomorrow Communications創辦人之一鄺志傑決定心動不如行動,將公司擴展至鄰近亞洲市場,從此香港外地兩邊走。 「想expand亞洲業務其實唔係近期嘅事,幾年前已經有哩個idea,又去當地睇過office,只係一直冇put into action。」他說。 決定走出去,因為在其他亞洲市場,鄺志傑希望找值得學習的地方,例如Digital experience、動畫、品牌建立等。他認為,現時香港廣告的主題過於單一。 「時下廣告太熱衷於二創、用明星,得返一兩招玩。客戶保守咗,冇乜安全感係事實。個個都衝流量,thematic、 branding創作變相少咗好多。我始終希望做有substance、有溫度啲嘅廣告。」 早前他為Breakazine第65期《離留誌》製作的短片「離留之間」,便是例子之一。 影片以「身份混沌」為起點,以「懸置未來」作結。有如此構思,因為香港移民潮湧,絕對是值得探討的社會議題,也是文化期刊《離留誌》希望聚焦的原因。 「一個人嘅作品唔多唔少都反映到一個人嘅characters。所以我做多咗關心社會嘅廣告,例如之前幫傷健協會嘅project,就覺得好有意義。」 廣告用黑白漫畫風描繪都市男女月台踏進地鐵車廂,和爬樓梯的一步之遙,再以「To you, it’s just a small step」串連系列,一句到位,帶出傷健人士面對的困難。 識玩、肯玩,NGO廣告都可以好好玩。 講到關心社會,不能不關心去年7月1日後在香港繼續做廣告的「前途問題」。當紅線越來越模糊,廣告界自然也不能獨善其身。然而,鄺志傑相信:「香港廣告唔會冇得做。難關每隔幾年都會出現一次,捱過就好。」 萬變不離其宗的過渡方法,依然是國際視野。 「我哋眼光唔應該只係喺香港,要國際化啲。以前香港嘅廣告經常入圍國際獎項,世界其他地方嘅人會有共鳴。宜家嘅香港廣告就算translate做英文,人哋都未必睇得明。」 我們仰望的日本、泰國等廣告各有特色,有些充滿著細節,有些閃爍著人性,世界通行。就算玩搞笑,笑位都應該click到香港以外的觀眾,至少亞洲觀眾,他說。 要帶領香港廣告再次走出去,在亞洲城市開設分公司只是第一步。在開拓市場、招攬regional客戶之上,打外地市場也為了兼作橋梁,為香港創作人搭橋舖路。 「有多一個亞洲市場,就可以互相轉介唔同範疇嘅creatives,例如導演、3D製作人等,幫佢地衝出香港。最終,我哋想喺幾個亞洲城市都有分公司,遊走亞洲。」 「遊走」,也許正是這年頭的生存之道。想對家鄉有實在的貢獻,留底不是唯一道路。畢竟,天時地利人和都完美配合,哪裡還需要創意? 「香港人嘅能力可以周圍都做到野,只要自己equip返哩個能力,香港廣告唔會冇得做。」

真正風靡全球!麥當勞 The BTS Meal 營銷案例

韓國天團防彈少年團BTS近嚟紅到發紫,連麥當勞都聞風「變色」,變咗紫色。 McDonald’s 聯乘BTS全球推出 The BTS Meal,6月3號登陸香港,同日起配合BTS巴士巡遊港九,將K-pop男團霸主的專屬「味」力,帶到全城熱點。 但唔好以為有巨星代言,就唔需要好嘅理念。 今次BTS計劃,跟去年美國麥當勞同饒舌歌手Travis Scott合作,賣到一度斷市的足三両漢堡一樣,都屬於「Famous Orders」系列。背後理念係,無論你有幾紅,梗有一款麥當勞套餐啱你口味。 而全新The BTS Meal包含嘅九件麥樂雞、中薯條同中汽水套餐,亦真係BTS成員平日嘅最愛餐單。 專題套餐更加入全新「蒜辣蛋黃醬」同「韓式甜辣醬」,就像BTS歌舞一樣,刺激創新。 呢次全球BTS campaign係名副其實嘅聲勢浩大,足足涵蓋全球49個地區。除咗有勢,仲夠晒徹底。 唔單止The BTS Meal嘅麥樂雞盒、汽水杯同紙袋都採用紫色配襯BTS Logo花紋,連BTS門形logo都由薯條組成。 你以為只係咁簡單?唔止,麥當勞 App 仲會一連幾星期發佈「BTS 360 Backstage 花絮」、「型爆相簿」同「e-閃卡 」,只要玩簡單遊戲,即可解鎖睇到更多花絮。 做到咁global、咁多細節、咁互動,確係influencer marketing嘅一大突破。 由即日起,麥當勞App用戶可憑電子優惠券購買The BTS Meal,即享減$3優惠,同時再用PayMe付款限時獨家優惠,買滿$30,即享9折,盡享慳上慳優惠。優惠可以無限次使用,畀你麥麥Pay,麥麥慳!

當Rose同Jack遇上強力吹葉機

挪威渡輪公司Fjord Line新廣告「Fast ship, slow kiss」惡搞鐵達尼經典一幕,sell 新船由挪威到丹麥只需2個幾鐘,像風一樣快。 據報導,吹歪面的效果並非CG特效,而係強勁吹葉機的慢鏡效果。 廣告公司POL Oslo原本想用“My Heart Will Go On”作為背景音樂,但不成功,最後請音樂家Lisa Stokke演繹 “You Raise Me Up”,以近似Celine Dion的聲線,模擬電影氛圍。 想說服一家船公司parody沉船電影,喺亞洲,難啲。

HKBallet聯乘HKPhil 呈獻Amadeus (a cyberpunk dream)

荷里活科幻電影𥚃的香港,在本土製作團隊的鏡頭下,更有味道。 HK Ballet同HKPhil請來《一念無名》及《擺渡人》美指張兆康執導全新短片《Amadeus》,以cyberpunk風格重現90年代懷舊香港,發一場香港夢中夢。 5分46秒,全片以一首莫扎特《小夜曲》貫穿,在莫扎特的夢境𥚃,中環伊利近街化身成迷幻的「未來香港」,當中穿插不少中西共融的今昔文化精髓,有人跳住芭蕾打街機,有人拉住小提琴打麻雀,有金魚街、超市手推車,還有一條微妙的感情線。 Making-of: 「香港芭蕾舞團嘅Ballet in the city活動,一直希望將芭蕾舞帶到社區,藝術總監Septime Webre提出以Cyberpunk為主題,我哋用咗香港東西文化,新舊結合嘅元素,去建立一個充滿懷舊嘅未來,relate返香港。」張兆康解釋。 「今次喺中環取景,由於cyberpunk主題,要喺深夜拍攝。正式拍攝前兩日先有機會到現場試位,中間一段舞蹈希望模擬一鏡直落,但由於場地人流同燈光限制,實際是分開四節拍,中間用後期stitch cut方法連接起來。」 以cyberpunk這種關於先進科技與糜爛生活的「High-tech, low-life」另類美學作為短片主題,頗為大膽。「主要因為香港同cyberpunk好有淵源,唔少cyberpunk電影都以香港作為靈感,例如《Blade Runner》、《Ghost In The Shell》等。Hong Kong Ballet非常open,畀好高自由度我哋創作。」 有自由土壤,先有好的創作。哩場霓虹盛宴,得來不易。

捕捉心理的《23點佐賀飯》美食動畫系列

想留住旅客的心,需先留住旅客的胃。 日本佐賀縣早前以「宵夜」招徠,推出一連十集《23 點的佐賀飯動畫》,以垂涎欲滴的美食動畫配合治癒進食聲效,在最容易肚餓的深夜11點播出,宣傳說,是因為11點較容易因倦意而令判斷力減低。 動畫出現的美食均屬佐賀縣特色美食,有竹崎牡蠣、竹崎蟹及伊萬里牛漢堡排等,加上聲優宮野真守的配音,喺11點播,相當邪惡。 用耳朵進食,是門有趣的心理學。 牛津大學實驗心理學教授Charles Spence主張「Sonic seasoning」,認為聲音是一種調味料,能提升或改變對食物的感知。而享受美食是五感的全方位體驗,除了口感、香氣和味道,食物或進食時所發出的聲音也能引起滿足感。尤其酥脆的聲音,能夠刺激大腦反應,聯想到新鮮、健康。 用心製作的廣告,由創作概念到發佈時間,每一環都有學問。 第一夜:竹崎牡蠣 第二夜:北方Champon麵 第三夜:佐賀牛 第四夜:竹崎蟹 第四夜:呼子魷魚 第五夜:西西里飯 第七夜:嬉野溫泉豆腐 第八夜:伊萬里牛漢堡排 第九夜:佐賀士多啤梨 第十夜:佐賀拉麵

Pocari 60秒廣告背後的夢幻實景

青春係咩? 係小清新? 係異想天開嘅空間? 係盡興? 在Pocari的廣告世界,全部都係。寶礦力尋日推出的60秒廣告「でも君が見えた」,為了呈現揮灑汗水的青春氣息,竟然製作出一條識郁的波浪跑道,將愛麗絲夢遊仙境式的幻景真實呈現,連那扇像在魚眼鏡下的扭曲大門,都是實景設計。 「でも君が見えた」篇 60秒: Behind the scenes: 搭建真實場景拍攝,在日本廣告並不罕見。 當年撼動一時的NTT docomo 原木手機 Touch Wood 廣告「森の木琴」,就在九州一處森林搭建了木琴一座,耗時 3 個月,一片木塊一個音階,讓緩緩落下的乒乓球敲出巴哈的樂章。據聞單是結尾一幕也拍攝了數十次。 比較近期的,有Brother日本的企業CM。該打印製機造商設置了一台重3.5噸的多米諾機關裝置,融合8款品牌旗下的多款打印機、縫紉機、掃圖裁藝機等產品,最後吐出「Konnichiwa, Brother desu」的訊息。 製作如此認真,難怪David Ogilvy在名著Ogilvy on Advertising的序言中提到: “I write only about aspects of advertising I know from my own experience. This is why this book contains nothing about media, cable television or advertising in Japan.” 日本廣告能夠自成一家,自然有無數值得學習的地方。

Factiv《Facts are bulletproof》品牌廣告

古往今來所有藝術創作的價值之一,是反映社會現實。 一家護膚品牌廣告,唔sell產品唔sell功能,反而由「真相」切入,講謊言、講失實,用藝術紀錄每當變幻時,作為本土品牌的心聲。 名為Facts Are Bulletproof的廣告配合一套5款媲美電影海報的明信片,每張印有關於真相與謊言的歷史名句,亂世下,別具收藏價值。 Factiv CMO Jennie話,成個campaign埋單約50萬,由廣告公司Society創作,對開業僅5年的品牌,算是高成本製作。 「因為今次係我哋第一個branding campaign,想create value俾大家,希望用事實喚醒大家認清真相,而唔係只extract value,所以想將我哋嘅理念講出嚟 rather than sell 產品。」 公司一直以No Fairy Tales作為邮品牌理念,因為「喺護膚嘅世界裡面冇奇蹟,只有不斷努力」,同香港現況不謀而合。 特別喜歡明信片上其中一句:「勇氣並不是有力量前行,而是沒有力量的時候依然繼續前行。」 ⁣ 求真,曾經是香港人追求的生活態度,無論營商、採訪。如此基本的態度,被印在紙上、剪到片中,先發現,唔講,可能就漸漸被遺忘。 在動輒得咎的時代,難得有本土品牌仍然選擇投資在信念上,用行動寄語香港人,在無間道上,繼續前行。 “If you’re going through hell, keep going.”

2021 愚人節品牌獻禮

愚人節,又係品牌大曬冷嘅時候。 今年芫茜離奇跑出,Durex的「一路向茜」新包裝,同Tempo芫荽味紙巾不約而同加重口味。 而一向走在愚人節最前線嘅IKEA,亦推出店內Staycation,提供長期廣告電視、制水廁所連浴室、不能翻開的多國語言小說等店內專屬「服務」,適逢復活節長假,點題有noise。 聽聞食辣皮膚好,譚仔三哥決定內外夾攻,推出麻辣面膜幫助美白,仲有廣告片配合,好認真。而兄弟檔譚仔就食外賣潮流,聯乘Foodpanda推出「水上電單車外賣服務 TamJai Express」同「咪跣」拖鞋,回應離島居民訴求。 IKEA宜家家居推出Staycation服務: 譚仔三哥米線推出10小辣美白面膜: Durex推出芫茜味安全套: Tempo推出芫荽味紙手巾: 譚仔 X @Foodpanda 推出 TamJai Express 及「咪跣」拖鞋: SAVEWO救世推出3DMASK飲管口罩: Pizza Hut x 鏞記燒鵝Pizza氣派登場: 新巴引入H2氫能巴士:

皇家阿爾伯特音樂廳150週年短片《Your Room Will Be Ready》

希望係咩?食得架?倫敦Royal Albert Hall 150週年短片《Your Room Will Be Ready》話你知:係。 短短90秒,導演Tom Harper將一座受lockdown影響變得空空如也的音樂廳包裝得如此動容,把圓頂下的當年今日、熱鬧荒蕪剪輯成強烈對比,上演一齣關於希望的好戲。短片還首次公開幾段30年代的珍貴歷史片段,包括邱吉爾、愛恩斯坦當年在音樂廳的演講。 一曲好旋律不止於治癒。夠鍾意,無論係classical 、rock n roll甚至death metal,音樂都可以係一種希望,一種精神解放。 睇過神戲《月黑高飛》,一定記得主角Tim Robbins在獄長室擅自廣播莫札特歌劇的經典一幕。Morgan Freeman旁白說,那把Marriage of Figaro意大利女高音,就像飛鳥闖入監獄,溶掉了圍牆,令所有人暫時忘卻了身在牢房。這就是自由,那怕只得一刻。 後來主角後被罰幽閉兩星期,卻不覺得難熬,因為有莫札特的旋律陪伴,在腦中,在心中。他說,這就是音樂之美,別人拿不走。 「音樂能夠提醒你,世界上還有一個地方不是石頭造的;有一個東西在你心裡,是屬於你自己的,冇人能夠觸碰。」 「什麼東西?」 「希望。」 紅館都快40週年了。作為曾經的香港流行音樂殿堂,就算冇邱吉爾、愛恩斯坦加冕,都肯定有無數個唱、頒獎典禮、棟篤笑archive值得香港人回味、宣傳,而非在Wiki吹虛「第43座參與幻彩詠香江的代表建築物之一」,自我貶值,令人唏噓。

姜濤全新演繹McDonald’s 經典巨無霸急口令 新推煙肉巨無霸

哥哥、梅姐等深得香港民心的藝人,花名有如家人親暱,而且一隻字就足以反映性情,例如張國榮的caring、梅豔芳的氣派。一個好暱稱,唔單止性格要夠突出,仲要為大眾認許,得來不易。 唔少人認識姜濤,都由姜B 開始。薈聚廣東話精髓的B字有種鄰家男孩的青澀,有活力,有氣魄。 為宣傳全新煙肉Big Mac,McDonald’s大玩姜B花名,B for Bacon,一句到位將品牌同姜濤活力掛鉤。 https://www.youtube.com/watch?v=cNnGq9dlVbc 負責人話,姜濤本身鍾意食漢堡包,亦曾經喺麥當勞兼職,同品牌早有淵源。製作團隊特別請來姜濤首本名曲《蒙著嘴說愛你》MV導演袁劍偉合作,推出一套兩款廣告片,另外一條又跳又玩急口令,前日就喺銅鑼灣金百利大電視同步播出,呼應早前fans曾經喺同一個螢幕賀佢得獎。 同場加映仲有姜B「全民急口令」Instagram濾鏡挑戰,大家只需於個人IG平台分享廣告急口令挑戰短片,並標記麥當勞 Instagram(@McDonaldsHK)同指定 Hashtag,即有機會被選中及嬴得姜濤親筆簽名咕𠱸,只限100名。Campaign仲配合AR濾鏡遊戲,掃描 Big Mac 系列飽盒就會見到姜B現身跳舞,一共八款,線上線下都陪你跳住食。 今日去老麥,已經見到姜B 嘅B FOR BACON 放到周圍都係嘞!

Back To Top