每逢有人做好事，總有人衝出嚟潑冷水。 Patagonia創辦人日前宣佈捐出公司98%股份予NGO，應對氣候危機。消息一出，例牌有人質疑此舉「漂綠」（greenwashing）、做show云云。 如果生意人講環保就等於做show，咁呢位以設計攀山裝備起家的創辦人Yvon Chouinard早就承認，每個以環保為原則做的商業決定，都確實有錢賺。 “I know it sounds crazy, but every time I’ve made a decision that’s best for the planet, I’ve made money.” 而呢場show都做得幾認真，例如自80年代起已自發交1%地球稅、採用有機棉同回收聚酯纖維，仲不時承認自己做得未夠好，例如2011年呢款平面廣告「Don’t Buy This Jacket」。 特登揀喺Black Friday叫人唔好買佢件jacket褸，原因寫在文案中，因為製作這件褸要用上135 lit水（相等於45人一日攝取量）同運輸產生的20磅碳排放等。 廣告當然唔係叫你罷買，而係叫你買之前諗諗。你可以批評佢搏眼球、虛偽，反正零成本。但你可曾見過淘寶叫人網購前三思？ 關於虛偽的指責，Patagonia似乎已見怪不怪，更曾回應：“It would be hypocritical for us to work for environmental change without encouraging customers to think before they buy.” 公關show認真做，仲做足幾十年，我又真係唔介意買飛入場睇。 更何況，能夠引發思考的廣告、舉動，是否做show，真係咁重要？
Wordle掀起的抽水熱潮
Wordle熱潮近月勢不可擋，品牌當然不遺餘力相繼抽水，當中尤以Guinness這個廣告最為精彩。 雖然這並非official ad，而是英國創意公司Something Big創作總監Sam Hennig為網上創意比賽平台One Minute Briefs設計的作品，但整個concept甚至比Guinness自己的抽水post更勝一籌。 更多品牌抽水作品： One Minute Briefs上還有不少啟發自Wordle的創意佳作，不妨作為靈感參考：
日本「流星」火車，劃破九洲夜空
一列火車，點解足以連繫人心？因為一束光。 這段剛榮獲日本廣告人協會（JAA）大獎的九州新幹線廣告片名為「流星新幹線」，構思好簡單，在行駛中的列車上打出幾束LED強光，在紀念火車開通的3月14日行駛一天，夜幕下就像一串流星，劃過福岡至鹿兒島的民居之間。 遠處，上萬名九洲居民在不同地方拿著「竹」光在流星列車劃過之際許願，呼應貼滿車身內外來自日本各地居民的願望，旨在把「希望之光帶給九州，帶給日本，帶給大家」，廣告如是說。 能夠拿下JAA電視廣告類大獎，要有「橋」之餘，更要夠意思。「流星新幹線」之所以找來上萬名居民參與拍攝，跟它多災多難的歷史有關。 幹線於2011年3月14日開通，配合一段被譽為「夢幻cm」 的3分鐘宣傳片上架，片中萬多名九洲居民對駛過的火車拍掌歡呼，非常upbeat。可惜幹線生不逢時，開通前三天撞正311大地震，因為廣告氛圍不符合民情，沒播出幾天就下架。 十年後的3月14日，九洲以至全世界都正被疫情摧殘，所以「流星新幹線」沿用十年前宣傳片的構架，加入一串劃破黑夜的「希望之光」，寄語我們一路往前。 最簡單的execution，足以發輝最大的效用，就好似希望呢家野，唔洗多，一點點就已經好夠。
Tinder話你知：You’re Not for Everyone
肯認錯，咪好囉；但如果真心想重新做人，好想贈你Tinder廣告一則：「You’re Not for Everyone」。 所謂寧缺莫濫。所以連「閲人」無數嘅交友平台Tinder都推出新功能Explore，依照用家興趣進行配對，言下之意，唔係個個都match架。 當然，這句tagline其實另有意思。 30秒廣告片只得一個場景：女主角好平靜咁做緊冥想瑜珈，突然神經質發作，向無意闖入的同房失控吶喊「I’ll murder your family！」，一秒人格分裂後重回平靜，又tender又loving。 呢種所謂quirks，亦即大大小小的怪誕行為，你有我有。咪以為自己好正常，試吓問身邊嗰個，或者你啲兄弟BFF，答案可能令你驚訝。 Tinder話你知，quirkiness is okay。唔單止ok，分分鐘成為你嘅個人風格像徵。一句口頭禪、一個小動作，或對一件舊物的執迷，每一種不敢示人的quirk，可能是在某人眼𥚃的可愛，甚至魅力所在。 但長期對某事物過於執迷……確實有損健康，花生食得多都熱氣啦，以後要三思啦。
Peloton 38秒神回覆《色慾都市》公關危機
所以話，唔洗元宇宙，我哋早已活在虛構世界。 HBO Max美劇《Sex and the City》再度回歸，新一季《And Just Like That…》第一集就發生命案，男主角Mr. Big喺Peloton健身單車運動後心臟病發身亡，令品牌不滿形象受損。 係人都知角色同橋段純屬虛構，演員Chris Noth仲生勾勾，但Peloton股價仍然因此下跌，反映大家煲劇的投入程度。市場還在眾說紛紜Peloton可否提告HBO Max之際，Peloton今日就畀咗個更好嘅回覆⋯⋯一條38秒廣告片宣佈：「And just like that…he’s alive」。 據說短片只用了48小時製作，Chris Noth幾句對白「To new beginnings 」、「I feel great」、「Shall we take another ride?」等，幽默反串Mr. Big在劇中的悲慘結局，喺Twitter出街唔夠半日，已斬獲3萬幾likes。 短片能否avert the crisis尚未可知，但比起同HBO對簿公堂，今次神回覆，確實大方得多。
Crypto.com X 麥迪文首個全球品牌廣告
對未知感到懷疑是人類本能。但歷史，從來都是由believers撰寫的。 十六世紀，麥哲倫相信人類可以征服海洋；上世紀初，萊特兄弟相信人類可以遨遊天際；60多年前，Edmund Hillary相信人類可以攀越珠峰；今日，Elon Musk相信人類可以登陸火星。 對未知的恐懼，成為了Crypto.com首個全球品牌廣告的主題。就算你對crypto唔認識、冇興趣，這齣由Matt Damon領銜主演的「Fortune Favours The Brave」55秒廣告，都可能有所啟發。 全片以麥迪文一句”History is filled with almost”展開。Almost，是失之交臂與創造歷史的天淵之別。有人”almost achieve”，有人”embrace the moment and commit”。只差一點點，原來豬乸都真係可以上樹。 廣告由兩位荷里活名導Wally Pfister、David Fincher及ad agency Pereira O’Dell聯合製作，以電影級CG重現麥哲倫、萊特兄弟、Edmund Hillary等trailblazers的歷史創舉，再由麥迪文三言兩語將crypto同人類史上的重要時刻掛鉤。 看似浮跨，但可能因為麥迪文，也可能因為crypto本身，諗深一層，其實不太跨張。 由維基百科的出現導致知識的去中心化，到社媒、網媒崛起造成大型傳媒的去中心化，decentralisation早已是進行式，不知不覺顛覆了我們的日常。貨幣以至藝術的去中心化，似乎只是遲早的事。 特別欣賞廣告出現的其中一項「歷史壯舉」——一男一女在nightclub擁吻。 點解可以同Elon Musk上火星並列？！ 因為創作團隊相信，大至探索太空，小至向心上人邁出愛的第一步，同樣需要勇氣，同樣是人類史上的重要時刻。只要你敢，人人都在微妙地改變著世界，人人都可以是歷史創造者。 更何況只係投資crypto？ 透過以下referral link登記Crypto.com帳戶，雙方即獲美元$25 ：https://crypto.com/app/ex4xvt8ggx
廣告狂人呈獻：數據分析 x 內容策略 拆解網絡媒體營銷
Social Media是咪一定要抽水？又有冇金科玉律話你知每日幾點係最佳出Post時間？ 計我話要做好Social Media，懂得睇數據同埋創作引人互動嘅內容，缺！一！不！可！但兩樣都要做到，談何容易？於是我邀請咗兩位好朋友兼大師一齊搞個Workshop。「廣告狂人呈獻：數據營銷 x 內容策略 」社交媒體課程，由前國際廣告公司、傳媒集團社交媒體總監 Jansen Lu (Jan’s Tech Blog) 及 前媒體公司CEO、公關及媒體顧問 Terry Yeung (Terry的媒體懶人堂) 為大家同時講解社交媒體的數據與內容策略。 請即WhatsApp 9725-0489報名 https://bit.ly/3nvh7e0 課程內容：上半場：社交媒體數據 (Jansen) * 社交媒體數據 = 演算法 + 廣告* 解說萬惡的演算法* 廣告與內容策略 下半場：社交媒體內容策略(Terry) *網絡內容創作竅門*不同平台的內容策略*如何處理公關災難 日期： 11月13日 (星期六 )時間： 早上10時至下午7時地點： 尖沙咀東部 科學館道14號 新文華中心A座7樓720室The Point價錢： HK$900 立即報名： https://bit.ly/3nvh7e0
麥當勞 X MIRROR史上最強陣容，全員集合將全港240間分店化身主題餐廳
本年度至hit營銷趨勢，唔係網紅帶貨，唔係NFT，而係——同廣告牌合照。 因為MIRROR，廣告牌變成一種誘惑。嗰種排隊影相嘅衝勁、同偶像（張相）同框嘅激情，至情至性。既可以同偶像「合照」之餘，同時保持一個尊敬嘅距離，呢份微妙，分分鐘滿足過同真人合照。 所以麥當勞今次搵齊MIRROR十二子全員上陣，以最強陣容將240間分店化身主題餐廳，其中喺金鐘海富中心旗艦店仲特設MIRROR打卡牆 ，一次過將12位成員大晒冷，配合店內多款型格硬照，零死角滿足一眾鏡粉同偶像「合照」嘅願望。 Campaign啟動一個禮拜，唔少分店都出現演唱會級嘅擠擁場面，特別係海富旗艦店，一度人流超負荷，仲不時傳出驚呼尖叫，可能係因為抽中咗男神張「鏡仔卡」啦。 因MIRROR而起嘅另一熱潮，唔少得「儲閃咭」嘅奇蹟回歸。一個笑容、一個眼神，將世人對數碼世界嘅著迷成功帶回線下，返樸歸真，重燃對一張卡紙嘅珍惜。 一套12款「鏡仔卡」連續四星期分階段限量推出，透過麥當勞App購買指定麥炸雞套餐隨餐附送。卡背仲隱藏神秘彩蛋，唔單止sell樣，仲sell human touch。 最強陣容，當然要配合最強宣傳策略。除咗店內嘅360度鏡仔海報，活動期間喺麥炸雞包裝盒仲印有十二位鏡仔肖像，加上AR小遊戲，可以同偶像一齊麥麥食，密密影。同場加映110架MIRROR主題巴士遊走各區，畀一眾鏡粉行到邊，影到邊。 由姜濤全民急口令到《男兒爭入樽》短片，麥當勞同MIRROR一路走來，從未試過全員出動。最鼎盛的陣容，當然要留返畀今次狂賀MIRROR成軍三週年嘅全港宣傳盛事。 今次規模，係繼早前BTS全球campaign之後，喺香港玩得最大嘅一次。呢種鋪天蓋地嘅customisation，相信會成為下一股營銷風潮。 大膽想像，如果可以乘勝追擊，將MIRROR campaign擴大至亞洲市場，達到上次聯乘BTS嘅效果，都未必冇可能。畢竟，姜濤都話：「我哋香港嘅歌手，相信一定可以再次變成亞洲第一。」 10月25日起，麥當勞App用戶可憑不同指定電子優惠券以優惠價購買麥炸雞，更可獲得隨機派發的鏡仔卡 !
Emirates Airline攝於828米高空的「巔峰」之作
用心做廣告，高處未算高。 Emirates為證明「We’re on top of the world」，決定go the extra mile找來「機組人員」站在全球最高大廈哈里發塔(Burj Khalifa)之巔，在828米高空將手中紙板一張張翻開，叫你fly Emirates，fly better。 短短30秒，以為只係Love Actually式浪漫，誰知鏡頭拉wide，竟然比King Kong更令人嚇破膽。 女主角原來係跳傘教練Nicole Smith-Ludvik，與製作團隊在僅僅1.2米闊的塔尖逗留5小時才完成拍攝。 由於concept太癲，廣告播出後引來不少人懷疑是綠幕效果，令阿聯酋航空決定分享behind the scenes表明真偽。 世界之巔，真係唔係人人站得起。
當Rose同Jack遇上強力吹葉機
挪威渡輪公司Fjord Line新廣告「Fast ship, slow kiss」惡搞鐵達尼經典一幕，sell 新船由挪威到丹麥只需2個幾鐘，像風一樣快。 據報導，吹歪面的效果並非CG特效，而係強勁吹葉機的慢鏡效果。 廣告公司POL Oslo原本想用“My Heart Will Go On”作為背景音樂，但不成功，最後請音樂家Lisa Stokke演繹 “You Raise Me Up”，以近似Celine Dion的聲線，模擬電影氛圍。 想說服一家船公司parody沉船電影，喺亞洲，難啲。